BR LA UNION – Iti maikatlo nga aldaw ti impeachment trial ni Vice President Sara Duterte, idi kalman, Hulyo 8, imbaga ti kampo na a ti maipagarop a panangipangta ti biag ni President Ferdinand Marcos Jr. ket bunga ti pannaka-arestar ti chief of staff na a ni Zuleika Lopez.
Segun iti depensa, nakaru a naapektaran ti Bise Presidente idi in-detain ni Lopez ti House of Representatives kalpasan a ma-contempt iti insayangkat nga imbestigasyon seknan iti confidential funds ti Office of the Vice President.
Iti panagusig, impakita pay ti kampo ni Duterte iti video a makita nga agsang-sangit ken panangkontra ni Lopez iti plano a maiyakar isuna iti Women’s Correctional Facility bayat nga adda iti kustodiya ti Nababa a Pagpandayan Linteg.
Nupay kasta, inlawlawag ti depensa a saan da nga ibagbaga nga umno wenno maiparbeng iti maipagarop a panagpangta.
Kinuna da a kayat da laeng nga ilawlawag iti sitwasyon a nanggapwan ti isyu.
Kabayatanna, pinalagipan ni Presiding Officer Francis “Chiz” Escudero dagiti senator-judges a liklikan ti agsalodsod kadagiti banag a mangiduron kadagiti abogado a mangipaay ti legal conclusion.
Maituloy ti panagdengngeg ti impeachment court iti Article IV ti impeachment complaint kontra kenni VP Sara inton Lunes, Hulyo 13.
Daytoy ket paset iti kaso nga adda pakainaigan iti maipagarop a grave threats ken alegasyon nga adda plano a panangdangran kontra kada Presidente Marcos, First Lady Liza Araneta-Marcos, ken sigud nga House Speaker Martin Romualdez.
