Dinayaw ni Speaker Ferdinand Martin Romualdez iti panangiraman kadagiti Overseas Filipino Workers (OFWs) iti Expanded Pambansang Pabahay para sa Pilipino (4PH) Program ti administrasyong Marcos, a segun kenkuana ket ebidensiya nga iti panggep ni Presidente Ferdinand R. Marcos Jr. ket sumayaat iti biyag dagiti maaw-awagan a baro a banuar ti pagilian.
Daytoy ket kasaruno iti anunsyo ti Department of Human Settlements and Urban Development (DHSUD) a karaman dagiti OFW iti socialized housing program iti sidong ti napalawa a 4PH, aniya man ti binulan a sweldo da.
Segun kenni DHSUD Secretary Jose Ramon Aliling, iti panakairaman dagiti OFW iti programa ket kas sungbat iti direktiba ni Presidente Ferdinand Marcos Jr. a palawaen iti paset ti kangrunaan a housing initiative ti gobyerno tapno ad-ado pay a Pilipino iti mabenepesiaran kangrunaan dagiti agan-anos iti ballasiw-taaw.
Maibasar iti Pag-IBIG Fund Circular No. 473, kwalipikado nga agapply para iti pabahay iti sidong ti 4PH dagiti OFW basta isuda ket aktibo a miyembro ti Pag-IBIG, first-time homebuyer, ken saan nga agtawen ti nasursurok ngem 65 iti oras ti aplikasyon. Kasapulan a masigurado nga isuda ket insurable agginga malpas iti termino ti loan, a saan a lumagpas iti tawen a 70.
Kabayatanna, kenuna ni Speaker Romualdez nga iti panakairaman ti OFWs iti 4PH ket maysa a dakkel nga addang tapno maaramid nga inklusibo ken nalaka a magun-od dagiti socialized housing program ti pagilian.
Al-allukoyen na met iti DHSUD nga agtultuloy a palawaen ken pasayaaten iti paset ken benepisyo ti 4PH tapno maipaay iti housing backlog ti pagilian nga addaan ti nasurok a 6.5 milyon iti agdama agginga 22 milyon inton 2040.
Sinigurado pay ti mamanday-linteg kenni President Marcos iti suporta ti liderato ti Kamara para iti panangaramid ti linteg ken budget tapno mapalawa iti oportunidad ti homeownership para kadagiti Pilipino.#
