Maysa a singasing a gakat iti naipila idiay Kamara de Representantes para iti pannakaitantan ti Barangay and Sangguniang Kabataan Elections (BSKE) a nakatuding a maisayangkat inton Nobyembre, agdama a tawen.
Nakapauneg iti House Bill No. 10407, nga insingasing ni Northern Samar First District Representative Niko Raul Daza, a maiyakar iti BSKE iti umuna a lunes ti Nobyembre 2028.
Segun daitoy ket agtalinaed paylaeng kadagiti posisyon da dagiti agdama nga opisyales ti Barangay kas holdover agingga maisayangkat ti sumaruno nga eleksyon. Nakailanad pay nga agraira latta iti uppat a tawen a termino para iti sumaruno a panagbobotos.
Tarigagay na a makasalimetmet iti pondo ti pagilian iti kangitingitan dagiti karit pinansyal, suplay ti enerhiya, ken panagngato ti presyo dagiti kangrunaan a magagatang.
Naipaganetget pay a nasken a maipangruna iti panagusar ti pondo para ti napatpateg a serbisyo ti kagimongan ken programa a pagbiagan.
Iti agdama, agtaltalinaed iti House Bill No. 10407 a kas singasing a gakat ken kasapulan pay a dumalan iti intero proseso ti lehislatura sakbay nga agbalin a linteg. | via Bombo Rafael Galano
