BR LA UNION – Immandar ni President Ferdinand R. Marcos Jr. ti panagipatakder iti modular shelter units, tapno adda mas kumportable a pagnaedan dagiti residente a napukawan ti babbalay kalpasan iti napipigsa a gingined, nga uray temporaryo laeng.
Iti maysa a situation briefing idi kalman, Lunes idiay Tarragona, Davao Oriental kalpasan ti dua a napigsa a gingined a timmama iti rehiyon idi Oktubre 10, imbaga ti Presidente a mangipasdek iti Department of Human Settlements and Urban Development (DHSUD) ti 150 modular shelter units iti probinsiya para kadagiti biktima ti gingined.
Segun iti DHSUD, marugyan ti panagipatakder dagiti modular shelter units inton Biyernes, a mabalin a pagakaran dagiti apektado a residente inton Lunes.
Dagiti modular shelter ket addaan ti kangrunaan a pasilidad kas ti comfort room, supply ti danum ken kuryente, ken communal kitchen.
Dagiti nasao a temporaryo a balay ket paset ti Integrated Disaster Shelter Assistance Program (IDSAP) ti DHSUD.
Immunan a nagpatulod iti modular shelter units ti DHSUD kadagiti nakaru a naapektaran a lugar idiay Cebu partikular idiay Daan Bantayan, San Remigio, ken Medellin—kas responde iti gingined a nangdayyeg iti probinsiya idi Setyembre 30, maiyannurot met laeng iti direktiba ni Presidente Marcos.
Segun kenni DHSUD Secretary Jose Ramon Aliling, maipatakder dagiti modular shelter units kadagiti maaw-awagan a “Bayanihan Villages,” idiay Cebu.
