BR LA UNION – Kuntento ni President Ferdinand Marcos Jr., iti nakita na nga adu a panagbalbaliw iti NAIA terminal 3.
Ininspeksyon itay malem ti Presidente dagiti kabarwanan a pasilidad ti Ninoy Aquino International Airport (NAIA) Terminal 3 iti sidong ti New NAIA Infrastructure Corporation wenno NNIC.
Segun iti Presidente a personal na a binisita iti NAIA terminal 3 tapno makita na mismo dagiti makunkuna nga improvement.
Maibasar iti naimatanganna, makunana nga adu iti nakita na a panagbalbaliw kadagiti pasilidad saan laeng a para kadagiti OFW, ngem ketdi para iti amin a bisita, gangannaet man wenno lokal a turista.
Adda pay baro a programa nga ad-adalen da tapno lalo a mapapartak iti taray dagiti biyahero iti immigration area.
Maipalagip nga in-turnover ti gobyerno iti NNIC iti operasyon ti NAIA idi September 2024 ket naipasidong iti serye ti upgrades.
