Binallaagan ni Presidente Ferdinand Marcos Junior ti publiko a saan a mangiwaras iti fake news kabayatan dagiti kalamidad, nangruna ti panagbettak ti Bulkan Kanlaon.
Segun iti presidente, napateg ti komunikasion bayat ti krisis gapu ta ti epektibo a panangsungbat iti didigra ket nakadepende iti umno nga impormasion.
Dayta ti gapuna nga inawaganna iti publiko a liklikan ti panagiwaras iti peke a damag gapu ta segun iti Presidente ket makapatay daytoy.
Kinuna ti PBBM nga agtultuloy ti panangipaulog ti PHIVOLCS kadagiti round-the-clock advisories iti lengguahe a nalaka a maawatan dagiti tattao.
Nagpakaasi pay daytoy kadagiti naapektaran nga umili, nangruna dagiti saan a kayat ti agbakwit, a dinggen da ti ballaag dagiti otoridad.
Impaganetget ti Presidente, napatpateg ti biag ngem sanikua tunggal kadagitoy a kasasaad.
