BR LA UNION – Inwaragawag ni Philippine Coast Guard (PCG) Spokesperson Commodore Jay Tarriela ita nga aldaw ti Miyerkules, nga aggayyem dan kenni SAGIP party-list Rep. Rodante Marcoleta kalpasan ti nabara a diskusyon seknan iti kontrobersyal a waragawag ti mammanday linteg seknan iti West Philippine Sea (WPS).
Nangrugi ti saan a panagkinna-awatan iti maysa a panagdengngeg idiay Kamara idi Martes seknan iti online disinformation, idi salodsoden ni Marcoleta iti inaramid a waragawag ni Tarriela seknan iti panangawag na kenkuana a “traydor.”
Banag a pinaglibakan ti tagapagsarita ti PCG.
Ingkagumaan ni Tarriela nga ipalawag nu apay a saanna dagus a kinorehir iti biddut nga impormasyon.
Kinuna na a kalpasan laeng ti interview ni Marcoleta idi Pebrero 10, idi inawaganna ni Tarriela nga “ignorante,” a naamwanna ti nasao a banag.
Nupay kasta, kalpasan ti nabara a diskusyon ket imbinglay ni Tarriela nga immasideg kenkuana ni Marcoleta ken naki-lamano.
Segun pay kenni Tarriela, imbaga ni Marcoleta a ‘Nothing personal.’ ket sinungbatan met ni Tarriela iti, ‘At least na-klaro natin, sir, na hindi ko talaga kayo tinawag na traydor.’
Kalpasan ti panagtinnunos dagiti dua, imbaga ni Tarriela a “close” dan kenni Marcoleta.
Kinuna pay ni Tarriela a dagiti nagbalin a waragawag ni Marcoleta ket mangipakita ti panangbigbig iti teritorial claims ti Pilipinas.
Innayonna pay iti kinapateg ti panagkaykaysa iti nasao nga isyu ket imbaga na a dackel a karit nu agsisina ti pagilian iti sango ti agtultuloy a panang-tagikua ti China iti paset ti WPS.
