Inlibak ni Philippine Charity Sweepstakes Office (PCSO) General Manager Mel Robles ti damag a na-hack dagiti personal details dagiti lotto winners.
Inawagan ti opisyal daitoy kas fake news ken kunana nga awan ti nakompormiso a sensitibo nga impormasyon manipud iti website wenno database da.
Nupay adu dagiti panaggandat nga mahack ti sistema da, nagtalinaed met a natibker ti digital defenses ti ahensya.
Pinagtalikudan ni Robles ti maysa nga online news report a nagkuna nga imimbestigaran ti PCSO ken DICT ti napasamak a data breach kadagiti lotto winners.
Kinuna ni Robles a ti news report ket manipud metlaeng kadagiti grupo ti hackers a mangar-aramid laeng ti nagan tapno agtrending da.
Ti nagwaras nga post ti Philippine Exodus Security, kinuna da a nakompormiso dagiti hackers ti personal information dagiti lotto winners pakairamanan dagiti nagan, address, phone numbers, IDs, kasta metten iti winning numbers.
Segun met kenni Robles, mabalin a ti nagun-od dagiti hackers ket ti email accounts dagiti empleyado ti PCSO manipud sadiay Cagayan branch.
Dagitoy ket listaan dagiti indibidwal a nag-avail iti promo idi Marso 2022 ken saan met a nagan dagiti mismo a nangabak ti lotto.
Impaganetget ni Robles a ti database da para iti lotto jackpot winner ket natalged iti head office ken iti branch offices da met ket saan a konektado kadaitoy.
