BR LA UNION – Nangidatag ti kaso a murder ken frustrated murder iti kampo ti National Bureau of Investigation (NBI) ken Philippine National Police (PNP) seknan ti pammapatay iti sigud a board secretary ti Philippine Charity Sweepstakes Office (PCSO) a ni Wesley Barayuga.
Segun iti NBI Organized ken Transnational Crimes Division (OTCD), a nagimbestigar ti kaso, kinaswan da dagiti personalidad nga adda pakainaiganna iti napasamak nga ambush idi 2020 a nakatayan ni Barayuga.
Karaman dagiti respondents iti reklamo ni sigud a PCSO general manager Royina Garma, sigud a National Police Commission commissioner Edilberto Leonardo, police officials Jeremy Causapin, Santie Mendoza ken Nelson Mariano.
Maipalagip a nagramot ti kaso kalpasan a nangipaay ti testimonya iti Quadcom ni Mendoza seknan iti insidente idi Hulyo 30, 2020, idi na-ambush ni Barayuga asideg iti opisina ti PCSO idiay Mandaluyong.
Iti testimonya na, inakusaran ni Santie Mendoza da Royina Garma ken Edilberto Leonardo kas utek iti pannakatay ni Barayuga, ngem pinaglibakan da Garma ken Leonardo ti nasao nga akusasyon.
