Naibalud iti uppat a tawen a nabaybayag ngem ti sentensiana ti maysa a person deprived of liberty gapu ta napaay ti maysa a korte a nangipatulod kadagiti dokumento a kasapulan tapno mapalubosan daitoy.
Daytoy ti rason nga inted ti staff ti korte iti konsultant ti Department of Justice idi kiniddawna ti pannakawayawaya ti maysa a person deprived of liberty (PDL) a nasurok nga uppat a tawen a nagbayag iti pannakaibaludna.
Iti internet post, kinuna ti international criminal justice expert ken Southern Illinois University Professor Raymund Narag a naibalud ti PDL iti pito a tawen idinto ta tallo laeng a tawen ti rumbeng nga agserbi isunaiti pagbaludan ti Cavite.
Kinuna ni Narag a naaresto ti PDL idi 2017 bayat ti kangitingitan ti drug war ti administrasion ni Duterte ken naidarum iti tallo a kaso a panagusar iti droga.
Isu ket naglikudanna ti basolna ken nakinegosio para iti nababbaba a dusa idi 2020 ken nasentensiaan iti maysa a tawen ti tunggal maysa para iti tunggal kaso, a nangted kenkuana iti tallo a tawen a pannakaibalud.
Kinuna ni Narag a nabalinan na nga ininterbiu ti PDL bayat ti panangisayangkat na iti training iti jail management.
Nagpakaasi daytoy kadagiti opisial ti pagbaludan a wayawayaanda ti PDL, ngem kinunada a saanda a kabaelan gapu ta kasapulan a paneknekanda kadagiti korte no pudno ti claim of release-na.
Segun kenni Narag, nakigtot dagiti staff ti korte idi naammuanda nga adda pay laeng iti pagbaludan ti nadakamat a PDL.
Idi Disiembre 2023, nagtitipon dagiti kangatuan nga opisial manipud kadagiti nadumaduma nga ahensia ti gobierno ken diplomatiko tapno tamingen ti kinaadu dagiti pagbaludan ken penal facilities ti pagilian babaen ti National Jail Decongestion Summit.
Kas paset ti decongestion efforts, iparpartak ti gobierno ti pannakawayawaya dagiti PDL a nalabesen ti panagtalinaedda iti pagbaludan.
