Madama paylaeng ti assessment ti perdisyon a nagun-od ti barko ti Bureau of Fisheries and Aquatic Resources (BFAR) a BRP Datu Pagbuaya a dua a daras a binombo ti water cannon ken inipit ti China Coast Guard vessel asideg ti Bajo de Masinloc idi Disyembre 4.
Kinuna ni Philippine Coast Guard spokesperson for the West Philippine Sea Commodore Jay Tarriela, ururayen da pay ti panagsangpet ti BFAR vessel iti sangladan sadiay Bataan tapno ma-assess ti kadakkel ti nagbalin a perdisyon na.
Immunan a pinasingkedan ti opisyal ti nasao nga agresyon manipud kadagiti tallo a China Coast Guard vessels ken dua a Peoples’ Liberation Army Navy vessels kabayatan a mangisaysayangkat ti BFAR vessel, kakadua dagiti PCG vessels ti routine maritime patrol idiay Bajo de Masinloc tapno suportaran dagiti mangngalap sadiay.
Iti sabali met nga insidente, naballigi latta a naibunong ti PCG ken BFAR ti supply a langis ken taraon kadagiti mangngalap a Pilipino sadiay Bajo de Masinloc ken Escoda shoal.
