Tapno mataming ti wastewater concerns ti most visited tourist destination ditoy probinsya, nangaramid ti Provincial Government of La Union kakadwa dagiti Local Government Unit iti San Juan ti baro nga Septage Treatment Plant a pormal nga naluktan idi Enero 24, 2025 idiay Barangay Sinapangan, San Juan, La Union.
Indauloan ni Governor Raphaelle Veronica “Rafy” Ortega-David ken San Juan Mayor Arturo Valdriz iti event a dinar-ayan met dagiti lokal nga opisyales, barangay councils, ken mangibagi manipud nagduduma nga opisina ti gobierno ken organisasyon.
Tarigagay ti pasilidad a pasayaaten ti wastewater management kas panagtungpal ti Republic Act 9275, pagaammo pay kas Philippine Clean Water Act of 2004.
Ti ili ti San Juan nga pagaammo kas “Surfing Capital of the North,” ket kadawyan a makapadpadas iti nangato a bilang dagiti turista a mangigubuay met ti kanayunan nga wastewater production.
Tapno mataming iti problema, inasistir ti PGLU ti San Juan LGUs iti panangisayangkat ti feasibility study ken panangibangon ti pasilidad, bayat nga impaay met ti munisipalidad ti nausar a daga para kadaitoy.
Dalusan ti Septage Treatment Plant dagiti wastewater manipud kabalayan ken pasdek-negosyo, tapno masiguro ti natalged a pannakaturong daitoy iti baybay wenno mausar para iti irigasyon.
Impaganetget ni Governor Rafy ti kinapateg ti pasilidad para iti environmental sustainability bayat nga nagyaman met ni Mayor Valdriz para iti suporta ti PGLU a nangipamatmat iti tarigagay dagiti opisyales ti probinsya para iti panangsalaknib ti aglawlaw ken salun-at ti publiko.
