Kinuestionar ti Private Hospitals Association of the Philippines Incorporated (PHAPi) ti pannakayakar ti P89.9 bilion a sobra a pondo ti Philippine Health Insurance Corporation (PhilHealth) iti national treasury, a dinakamatda a saan pay a nagbayad ti health provider kadagiti claims manipud kadagiti pribado nga ospital.
Kinuna ni PHAPi president Doctor Jose Rene de Grano nga agarup P4 agingga iti 6 billion paylaeng ti utang ti PhilHealth a claims manipud kadagiti pribado nga ospital.
Idi 2023, adda utang ti PhilHealth kadagiti pribado nga ospital ti saan a nababbaba ngem P10 billion claims.
Agtultuloy nga umad-adu ti dayta a gatad bayat nga agtultuloy nga umay dagiti pasiente ken saan met a mabalin nga agkedked dagiti pribado nga ospital nga umawat wenno agkedked a mangipaay iti PhilHealth grants.
Kas sungbat, inkari ti PhilHealth a bayadanna ti nangato a porsiento ti P27 billion a bayadan iti ospital iti uneg ti 90 nga aldaw a pakairamanan dagiti saan a nabayadan a claim manipud kadagiti pribado nga ospital.
Imbilin ti Korte Suprema ti sumagmamano a nangato nga opisial ti gobierno a mangisubmitir iti komentoda iti petision a manglapped iti pannakayakar ti sobra a pondo ti PhilHealth iti national treasury.
Idi Mierkoles, nangiruar ti Department of Budget and Management iti listaan dagiti prioridad a programa ken proyekto a mapondoan babaen ti sobra a pondo dagiti korporasion nga ipatpataray ti estado.
Iti mapattapatta a gatad ti P200 billion, karaman kadagiti programa ken proyekto ti government counterpart dagiti foreign-assisted projects, personnel benefits, public health emergency benefits ken allowances para kadagiti health care ken non-healthcare workers, ken panagbayad iti right-of-way.
Immunan a kinuna ni Finance Secretary Ralph Recto nga adda legal a basaran ti bilin a maipatulod ti sobra a pondo ti government-owned and controlled corporations.
