BR LA UNION – Inpadamag ti Embahada Pilipinas idia Washington D.C. nga awan ti Pilipino a nairaman iti napasamak a panagdinnungpar ti maysa a pampasahero nga eroplano a naggapo idiay Kansas, iti US Army helicopter iti tangatang asideg idiay Reagan National Airport idiay Washington, D.C idi rabii ti Miyerkules, oras idiay Amerika.
Iti inruar nga statement ti Embahada, nainget a naka-monitor da iti nasao nga insidente.
Agtultuloy iti isay-sayangkat a search and rescue operations dagiti otoridad sadiay.
Kinumpirma pay ti White House iti simmalpot a military helicopter iti commercial jet.
Immuna ti daytoy, impadamag dagiti opisyal idiay US ti panagdinnungpar ti American Airlines regional passenger jet nga addaan ti 60 a pasahero ken 4 a crew members ken US Army Black Hawk helicopter a nagluganan ti 3 a suldado bayat nga adda iti tangatang ken nagsuwek idiay Potomac River.
Segun met kenni US Senator Ted Cruz ti Texas nga adda dagiti natay iti insidente ngem saanna pay a kinumpirma nu manu iti fatalities.
