BR LA UNION – Ibilang iti Department of Migrant Workers (DMW) ken Philippine Embassy nga isolated case iti pannakairaman ti maysa a Filipino domestic worker, iti kaso a panangpatay ti anak nga ubing dagiti employer na idiay Kuwait.
Iti inruar nga statement ti Philippine Embassy in Kuwait, imbaga na a nakigtot da met ken malidayan da unay iti napasamak a trahedya.
Kagiddan daytoy ti panangipeksa da ti simpatiya ken kararag iti natayan a pamilya.
Maibasar iti report, maipagarop nga impisok ti saan a nainaganan a Filipino domestic worker iti aywanna nga ubing iti uneg ti washing machine iti mismo a pagtaengan dagiti amo na.
Naalerto dagiti nagannak idi mangngegan da ti ikkis ti ubing, ket dinag-dagus da a napan kinita.
Maipagarop a nakita da ti anak da nga adda iti uneg ti washing machine ket inturong da iti ospital ngem natay met laeng.
Maipagarop a nagsagaba pay ti ubing iti sumagmamano a dunor ti bagi.
Kabayatanna, iti sabali nga statement, imbaga ti Department of Migrant Workers a maki-koordinar da kadagiti Kuwaiti authorities tapno maimbestigaran ti insidente.
Nagkari ti ahensiya a mangipaay ti kasapolan a tulong iti naibalud a pinay maid, maiyannurot iti linteg ti Kuwait.
Impasigurado met ti Department of Migrant Workers, a ti kauddian a pasamak iti nasao a pagilian ket saan a repleksiyon iti pudno a values wenno kababalin dagiti Overseas Filipino workers a nalatak babaen ti saguday a naanus, manag-paga, nagaget, ken propesyunal nga agtrabaho.
Napasamak ti insidente, sumagmamano laeng a bulan kalpasan a naibabawi ti visa ban dagiti OFWs idi Hunyo 2024.
Maipalagip a naipatungpal ti visa van idi May 2023, gapu iti pannakatay ti OFW a ni Jullebee Ranara, nga inuram ti bagi na, ingkali iti disyerto, ken narekobre ti bangkay na iti disyerto idi January 21, 2023, babaen iti anak a lalaki ti employer na.
