BR LA UNION – Inarestar dagiti otoridad idiay California iti 28-anyos a Pinoy ken US green card holder a ni Mark Lorenzo Villanueva gapu iti maipagarop a panagpatulod ti kuwarta kadagiti indibidwal a konektado iti terorista a grupo nga Islamic State of Iraq and Syria (ISIS).
Sumangsango ita iti kaso nga ‘attempting to provide material support for a foreign terrorist organization,’ nga adda katukad a pannusa a 20 tawen a pannakaibalud.
Segun iti Department of Justice (DOJ), maipagarop a nagpatulod ni Villanueva ti $1,615 (kaibatugan ti nasurok P92,000) iti uneg ti lima a bulan iti intermediaries wenno taga-ballaet a konektado iti ISIS, ken imbagana pay iti tarigagay na a lumaban ken matay para iti grupo.
Nakadiskubre pay ti Federal Bureau of Investigation (FBI) iti maysa a banag a maipagarop a kaar-arngi ti bomba iti kwarto na.
Kabayatanna, impasigurado iti Department of Foreign Affairs (DFA), a naka-monitor da iti kaso ken nakasagana da a mangipaay ti maiyannatop a legal a tulong para kenni Villanueva.
