LA UNION – Nakadepende iti Department of Justice iti panangidatag ti komento wenno panangkedked iti plano ti kampo ni KOJC leader Pastor Apollo Quiboloy nga ag-petisyon tapno maiyakar daytoy iti kustodiya ti AFP wenno ipasidong iti house arrest.
Inlawlawag ni PNP spokesperson Col. Jean Fajardo a ti DOJ ti nangipila iti kaso idinto nga iti PNP, ti Criminal Investigation and Detection Group (CIDG) ti nangiserbi ti arrest warrant kontra kenni Quiboloy.
Maipalagip nga idi Marso 4, ti agdama a tawen, ni Justice Sec. Jesus Crispin Remulla iti nangipila ti kaso a child abuse ken human trafficking kontra kenni Quiboloy ken 5 a kakaduana.
Mainaig iti daytoy, agtaripnong ti PNP ken DOJ tapno pagsaritaanda ti sumaruno nga addang.
Immuna ti daytoy, imbaga ni KOJC legal counsel Atty. Israelito Torreon idi Lunes a mangipila da ti petition tapno kiddawenda a mauiyakar ni Quiboloy iti sidong ti kustodiya ti AFP wenno maipasidong iti house arrest gaputa agtawenen ti pastor iti 74 nga addaan ti kondisyon iti salun-at.
Nupay kasta, iti biang ti Department of National Defense, nga addaan iti hurisdiksyon iti AFP, nainget a kontraenda ti anyaman a gandat a panangiyakar kenni Quiboloy iti kustodiya militar gaputa saan a maitutop nga ahensiya ti mangala iti kustodiya kadagiti suspek iti kaso kriminal.
