BR LA UNION – Nadutokan kas baro a force commander iti 1st Provincial Mobile Force Company (1st PMFC) iti La Union Police Provincial Office (LUPPO) ni PLtCol Marvie C. Amilao, kasukat ni PMaj Reymar L. Remegio.
Naisayangkat ti turnover ceremony iti baetan ti dua nga opisyal idiay Camp Diego Silang, Brgy. Carlatan, San Fernando City, La Union idi kalman, Marso 18, iti panangidaulo ni La Union Police Provincial Director, PCol. Heryl L. Bruno.
Ni PLtCol. Amilao, ket sigud a nagserbi a unit chief iti Provincial Drug Enforcement Unit (PDEU) ti LUPPO, tubo ti Cervantes, Ilocos Sur, ken miyembro pay ti Public Safety Basic Recruit Course, Class of 2003, iti Special Action Force (SAF) ti PNP.
Manipud 2022 agingga 2023, nagserbi ni Col Amilao kas battalion commander iti Special Action Battalion iti PNP-SAF idiay Eastern Mindanao, agingga a na- reassign iti LUPPO, nga immuna a nadesignaran kas unit chief iti PDEU sakbay a nagbalin a force commander iti 1st PMFC.
Iti kangrunaan ita nga akmen ti opisyal ket papigsaen pay iti operational capabilities ti puwersa ti pulisiya ken community engagement para iti preparasyon iti masungad a 2025 midterm elections.
Iti panagsarita ni PLtCol. Amilao, nagkari a pagtalinaedenna iti highest standard a panagserbi ken integridad a kabuyog ti baro a naikawes a posisyon na ken nagkari pay a nainget a makitinnulong iti local government units ken iti kommunidad, tapno magun-od ti tarigagay ti PNP a mantiniren ti urnos ken kapya iti area of responsibility (AOR).
Kabayatanna, iti outgoing acting force commander iti 1st Provincial Mobile Force Company, a ni PMAJ REMEGIO, ket nadutokan ket kas baro nga officer-in-charge ti Santol Police Station, sinukatanna ni PMaj Lyndon L Pang-ag.
Iti 1st Provincial Mobile Force Company ket maysa nga specialized unit ti LUPPO, a mangipapaay ti mobile ken rapid response capabilities iti 1st District ti La Union.
Malaksid dayta, pagrebbengan da a suportaran iti naduma-duma a police stations iti masakopan, babaen iti panangisayangkat ti panag-patrolya, panangimanehar ti crowd control nu adda protesta wenno riribok ti maysa a lugar wenno public disturbances, ken mangsolbar kadagiti security concerns iti nasulinek a lug-lugar.
