Naduktalan ti operasion ti maysa a paktoria ti Shabu iti paabangan a balay idiay Tanza, Cavite kalpasan ti napasamak a panagbettak.
Kinuna dagiti residente nga agarup alas singko ti bigat idi nangngegda ti napigsa nga uni. Napartak met a nagsitakyas dagiti tenants iti balay.
Nakita pay iti CCTV ti Barangay Sahud Rain dagiti dua a lallaki nga immuna a pimmanaw agturong ti Antero Highway a sinaruno ti dua pay a lallaki ken dua a babbai.
Kinuna ni Barangay Chief Recto Fojas nga idi pay Nobiembre idi naka-transaction ti makinkukua ti balay dagiti tenants babaen ti social media.
Kabayatanna, nakita met dagiti bombero ti maysa a kwarto a mapapati a pakalutlutwan dagiti shabu.
Kinuna ti Philippine Drug Enforcement Agency (PDEA) a 20 a kilo ti illegal a droga ti maar-aramid kas maibasar iti natakuatan nga ebidensia.
Mangisaysayangkaten ti imbestigasyon ti PNP ken PDEA ti pakabigbigan dagiti gangganaet ken Pilipino a nagrenta ti nasao nga balay.