BR LA UNION – Inyanunsyo ti Philippine National Police – Aviation Security Group (PNP-Avsegroup) iti pannaka-aresto ti maysa nga Overseas Filipino Worker (OFW) a nasurok maysa a dekada a wanted iti kaso a theft.
Naaresto ti suspek idiay Ninoy Aquino International Airport (NAIA) Terminal 3 idi rabii ti Domingo, iti maysa a joint operation ti PNP-Avsegroup ken Pasay City Police Station.
Iti suspek ket naggapo idiay Istanbul, Turkey.
Segun iti PNP-Avsegroup, ti suspek ket na-flag ti immigration personnel, babaen iti bileg ti maysa nga Alias Warrant of Arrest a naipaulog pay idi 2014.
Dagus a naki-koordinar dagiti otoridad iti naduma-duma a law enforcement units a nagresulta iti napaspas a pannakaaresto ti suspek.
Adda ita daytoy iti kustodiya ti Pasay City Police Station para iti maiyannatop a dokumentasyon ken agtultuloy a legal a proseso seknan iti nabayagen a kaso.
