BR LA UNION – Inlawlawag ti Philippine National Police (PNP) nga ikkaten da a respondent ken iti posibilidad nga adda pakainaigan ni Alvin Que iti panangdukot ken panangpatay ti ama na a ni Anson Que ken driver daytoy a ni Armanie Pabillo.
Segun kenni PRO III Director ken PNP Spokesperson PBGen. Jean Fajardo, awan ti umdas ken direkta nga ebidensya a maiprisinta ti suspek a ni David Tan Liao, a nangimameg iti anak ti biktima iti nasao a krimen.
Kinuna ni Fajardo, agsumite iti PNP Anti-Kidnapping Group unit ti mosyon tapno amyendaran iti reklamo ken ikkaten ni Alvin Que iti listaan dagiti respondents inton bigat, Biyernes, iti mismo nga opisina ti Department of Justice (DOJ).
Maipalagip nga inakusaran ni Liao iti anak ti biktima, a maipagarop a nangimandar tapno isayangkat iti panagdukot ken panangpatay iti bukodna nga ama.
Ita ket inawagan ti PNP a posible a maysa laeng daytoy a diversionary tactics ni Liao tapno kalluban ti dadduma a kakadwa da iti krimen.
