LA UNION – Plano ita ti Philippine National Police ken Department of Transportation a mangbukel ti maysa nga “Special Team” kontra kadagiti pulis nga iligal nga ages-escort kadagiti VIP.
Iti naisayangkat a presscon, imbaga ni PNP Public Information Office chief PCol. Jean Fajardo, paset daytoy iti ar-aramiden nga addang dagiti otoridad tapno labanan iti “moonlighting” a posible a pakairamanan ti sumagmamano a miyembro daytoy.
Iti agdama kunana, naki-koordinaren ti PNP iti DOTr seknan iti pannaka-buangay ti nasao nga special team a buklen dagiti kameng ti DOTr, MMDA, HPG, ken Integrity Monitoring and Enforcement Group.
Ag-operate iti nasao nga special team iti intero a pagilian, ngem maipatungpal nga umuna idiay National Capital Region, babaen iti isayangkat na a random inspection iti kangrunaan a kalsada iti rehiyon.
Maipalagip nga itay kallabes ket inarestar dagiti otoridad iti dua a kakadwa da a miyembro ti Special Action Force a naamwan a mangipapaay ti security escort iti maysa nga VIP a nagresulta iti pannakai-ikkat da iti puwesto a nakairamanan ti superior dagitoy.
