Mangiruar manen ti subpoena ti Philippine National Police (PNP) kontra kenni Senador Ronald “Bato” Dela Rosa.
Segun kenni PNP Spokesperson Police Brigadier General Randulf Tuaño, ituloy da iti panangited ti subpoena kontra iti Senador kasaruno ti damag a nakalibas daitoyen idiay Senado itay pay parbangon.
Maipalagip nga imbabawi da iti kalman ti immuna a subpoena a kas panagraem ti institusyon iti Senado mainaig ti Senate protection order nga impaay da para kenni Senador Dela Rosa.
Impaganetget met ni Tuaño a saan da a maaramid nga arestaren ni Dela Rosa nga uray addaan daitoy iti arrest warrant a manipud sadiay International Criminal Court (ICC).
Ti rason ket awan pay iti naaw-awat ti PNP a pammilin manipud National Central Bureau (NCB)/Philippine Center on Transnational Crime (PCTC) nga isu ket local branch ti INTERPOL ditoy Pilipinas.
