Binilin ni Interior Secretary Juanito Victor Remulla iti Police Regional Office-Central Luzon (PRO-3) a paingten ti panangrautda kadagiti private armed groups (PAG) sakbay a mangrugi ti aktibidad ti eleksion inton sumaruno a tawen.
Impalgak daytoy ni Remulla kabayatan ti panagbisitana iti headquarter ti PRO-3 idiay Camp Olivas, San Fernando City, Pampanga, a nangibilinna kadagiti opisyales nga –disband dagiti private armed groups nga us-usaren dagiti politiko tunggal panawen ti eleksion.
Segun kenni Remulla, masapul a mapagbalin a natalged ken nawaya dagiti komunidad manipud iti impluensia dagiti awanan linteg nga elemento.
Malaksid iti daytoy, kinunana a kasapulan met a siguraduen ti polis ti kinatalged dagiti kandidato bayat ti panangsurotda iti polisia ken panagtalinaed nga apolitical.
Namnamaen ni Remulla a mawaswas amin nga private armed groups iti PRO-3 sakbay ti bulan ti Marso.
