BR LA UNION – Pinaglibakan ti Philippine National Police (PNP) ti alegasyon a rinaut dagiti pulis ti pagtaengan ti pamilya Duterte idiay siudad ti Davao idi bigat kalman, Mayo 1.
Maibasar iti palawag ni Davao City 1st District Rep. Paolo ‘Pulong’ Duterte, kondinarenda ti inaramid ti PNP-Criminal Investigation and Detection Group (PNP-CIDG) gapu iti mapapati a panangriribuk da ti pamilya na.
Dagus met nga inlawlawag ni PRO III Director ken PNP Spokesperson PBGen. Jean Fajardo a dagitoy a maisaksaknap nga impormasyon ken waragawag ni Cong. Pulong ket bin-ig a fake news, banag a a sinuportaran met ni Davao City Police Office Chief PCol. Hansel Marantan.
Inlawlawag pay ni Fajardo a saan nga aramid ti PNP ti mangiyebkas kadagiti espekulasyon maipapan kadagiti motibo ken rason dagiti personalidad a mangitantandudo kadagiti negatibo nga isyu kontra iti organisasionda.
Kinunana a makita laeng ti PNP dagitoy a klase ti isyu a maibatbato nga isyu kontra kadakuada kas paset ti pagrebbenganda ken kinunana a situtured a sanguen dagitoy.
Kabayatanna, nagpawagan pay ni Fajardo a tulongan ti organisasyon da a maidanon ti umno nga impormasyon iti publiko tapno malapdan ti panagwaras ti palso nga impormasyon ken disinformation.
