BR LA UNION – Maituloy ita nga aldaw, Hunyo 22, iti pre-trial conference para iti impeachment trial ni Vice President Sara Duterte, ken ilep-leppas ti agsinnumbangir a benneg iti panang-marka dagiti ebidensya sakbay ti pormal a panagusig idiay Senado.
Iti pre-trial ket agserserbi nga initial meeting ti defense ken prosecution panel sakbay nga agtugaw dagiti senador iti impeachment court. Nakatuding a mangrugi ti aktuwal nga impeachment trial inton Hulyo 6.
Iti agdama, ad-adalen ken iyur-urnos ti agsumbangir a kampo dagiti dokumento nga adda pakainaiganna iti uppat nga articles of impeachment kontra iti Bise Presidente, kabilang ti maipagarop a misuse of funds, unexplained wealth, bribery, ken dadduma pay nga alegasyon.
Segun kenni Atty. Michael Poa, defense team ni VP Sara nalpas dan a markaan dagiti ebidensya para iti sumagmamano a paset ti kaso, ngem kasapolan da pay kunana ti kanayunan a panawen para iti ad-adu a dokumento nga adda pakainaiganna iti sumagmamano nga isyu a maipagarop a mas nalawlawa ken mas komplikado.
Kabayatanna, indaulwan ti Senate Secretariat iti proseso kas impeachment court, bayat nga aktibo a makipas-paset iti prosecution panel manipud House of Representatives.
Segun iti House prosecution team, naidatag dan iti pre-trial brief aken dadduma pay a kasapolan a dokumento para kadagiti senator-judges.
Nakatutok da iti panagisagana iti ebidensya, saan nga iti bilang ti botos a kasapolan para iti panagusig ngem ketdi nu kasatnu da a mailawlawag a nasayaat iti presentation of evidence.
Maipalagip a ni Sara Duterte ket na-impeach idi Mayo 11 kalpasan a nakagun-od ti botos a 257 iti House of Representatives seknan dagiti alegasyon a biddut a panangusar ti pondo ken dadduma pay nga isyu.
