LA UNION – Pimmusayen iti beterano a direktor, mannurat, ken comic strip creator a ni Carlo J. Caparas, iti edad nga 80.
Daytoy ti kinumpirma ti anak na a ni Peach Caparas, ngem awan ti nadakamat nu anya’t nakatayan ti premyado a direktor.
Kinuna a pimmusay iti ama na idi rabii ti Sabado, Mayo 25.
Dagus met a nangipaay ti detalye ni Peach seknan iti pannakalamay ti ama na.
Mangrugi a mailukat ti lamay inton Lunes, May 27, 2024, manipud alas 12:00 ti aldaw agingga alas 12:00 ti tengngat rabii iti Golden Haven Memorial Chapels and Crematorium, idiay Las Pinas City.
Malaksid iti panagbalinna a direktor ken producer, immuna a naam-ammo ni Carlo J. Caparas kadagiti obra na iti komiks, babaen kadagiti pinartuat na a Filipino superhero ken classic characters kas kada Panday, Bakekang, Totoy Bato ken Tuklaw.
Iti naudi a pelikula nga inaramid ti pimmusay a direktor ket iti “Kamandag ng Droga” nga adda pakainaiganna iti problema ti Pilipinas iti ilegal a droga, partikular iti panagtakem ni sigud a Presidente Rodrigo Duterte.
Idi 2009, napadayawan ni Carlo J. Caparas ti National Artist for Visual Arts and Film, ngem inimbalido ti Supreme Court idi 2013.
Naldaangan idi ti direktor ngem imbaga na nga ires-respeto na iti desisyon ti Korte Suprema.
