BR LA UNION – Nakitaripnong ni US President Donald Trump kadagiti European leaders a pakairamanan ni Ukraine’s President Volodymyr Zelensky idiay White House ita nga aldaw (Lunes idiay Amerika), tapno kitaen dagiti pamay-an ken wagas iti panangprotektar ti Ukraine ken manggibus iti lumawlawa nga agresyon ti Moscow.
Inallokoy dagiti European leaders ni Trump a mangaramid iti security guarantees para iti Ukraine, nu bilang umannugot ni Zelensky iti katulagan a manggibus iti giyera.
Segun kenni Trump, nakasagana a mangipaay ti seguridad iti Ukraine ken mangiruar ti resolusyon tapno magun-od ti tulagan pangkapya iti baetan da ti Russia.
Kinasarita metten ni Trump ni Russian President Vladimir V. Putin tapno rugyan ti panangituding iti posible a direct meeting iti baetan da Zelensky ken Russian leader, ngem saan pay a nalawag nu adda mapasamak a sesyon wenno panagtaripnong dagiti dua a maseknan a lider.
Nagbalin a kalmado ita ti pannakitaripnong ni Zelensky kenni Pres. Trump maisupadi idi immuna a nagkita dagiti dua.
Pinagyamanan ni Zelensky ni Trump iti panangilungalong na nga aggibusen ti giyera da iti Russia.
Kabilang iti nasao a panagtataripnong da European Commission President Ursula von der Leyen, British Prime Minister Keir Starmer, Finnish President Alexander Stubb, French President Emmanuel Macron, Italian Prime Minister Giorgia Meloni, German Chancellor Friedrich Merz ken North Atlantic Treaty Organization (NATO) Secretary-General Mark Rutte.
