BR LA UNION – Nakatuding a pirmaan ita nga aldaw, Disyembre 30, ni President Ferdinand Marcos Jr. iti General Appropriations Bill (GAB) wenno gakat a pondo ti pagilian para iti sumaruno a tawen, tapno naan-anay nga agbalin a linteg.
Daytoy ket kagiddan ti sumagmamano a nakalinya nga aktibidad para iti 128th Rizal Day.
Segun kenni Presidential Communications Office (PCO) Acting Secretary Cesar Chavez, dumar-ay nga umuna ni President Marcos Jr. kadagiti aktibidad idiay Luneta park para iti panang-selebrar ti anibersaryo ti pannakatay ni Dr. Jose Rizal, sakbay nga agdiretso idiay Palasyo ti Malacañang tapno pirmaan iti gakat a budget.
Immunan a siniguro ni President Marcos Jr. a mapirmaan iti General Appropriations Bill sakbay nga agelppas ti tawen.
Maipalagip a nakatuding a pirmaan ti Presidente iti gakat a budget ti pagilian nga agbalor ti P6.352 trillion idi Disyembre 19, ngem kinasapolan nga itantan para iti ‘extensive review’ dagiti sumagmamano a probisyon daytoy.
Sumagmamano nga aldaw a tinaripnong ni Presidente Marcos dagiti economic manager tapno talantanen iti National Budget ken madetermina nu anya dagiti programa wenno proyekto a kasapolan a pagtalinaeden wenno ikkaten iti budget.
