LA UNION – Agtultuloy iti panagngato ti presyo ti karne ti manok iti merkado.
Iti naudi a price monitoring report ti Department of Agriculture (DA), agay-ayam iti P190 agingga P250 kada kilo iti presyo ti karne ti manok iti pagtagilakwan idiay Metro Manila.
Daytoy ket ngimmato ti aganay P30 manipud iti sigud a P160 agingga P220 kada kilo iti napal-palabas a bulan.
Segun kenni United Broiler Raisers Association (UBRA) President Jose Gerardo Feliciano, nangato unay ti P250 kada kilo a presyo ti karne ti manok.
Rumbeng kunana nga agbalor laeng ti P210 agingga P230 kada kilo.
Inlawlawag ni Feliciano, iti panagngato ti presyo ti karne ti manok ket gapu iti panagbaba ti broiler stock kalpasan a kissayan dagiti poultry raiser iti tar-taraknen da a manok a pang-parti tapno maka-subbot da iti lugi dagitoy iti naglab-labas a bulan.
Maibasar iti agdama a presyuan dagiti piyek wenno broiler stock, ngimmato iti P43 kada piraso.
Dandani doble ti ngimmatuan na, a sigud ket agbalor laeng ti P24 kada piyek.
Aminado ni Feliciano nga adda panic iti biang dagiti producer, a kaipapanan a naing-pis iti supply dagiti day-old chicks.
