BR LA UNION – Natay ti maysa a suldado gaputi maipagarop nga aksidente a pannakapaltog na iti uneg mismo ti military outpost idiay Barangay Poblacion, Lacub, Abra idi Huwebes, Disyembre 25, 2025 aldaw ti paskua.
Nabigbig ti biktima a ni Private First Class Archie Calawit, nakadestino iti Charlie Company ti 50th Infantry Battalion.
Maibasar iti report, adda iti uneg ti outpost ti biktima ken maysa a kadwa na a suldado a maipagarop nga agdal-dalus ti paltog na a 9mm service firearm, mapatta-patta a 15 a metro ti kaadayu ti distansiya dagitoy, idi mapapati a kellaat a pimmutok ti paltog.
Timmama ti bala iti akinbaba a paset ti kannigid nga abaga ti biktima ken simmalpot iti ngato a paset ti barukong na.
Naiturong ni Calawit idiay Lacub Rural Health Unit ngem naideklara a dead on arrival.
Dagus a simmuko ti suldado ken manamnama a maidatagan ti maiyannatop a kaso.
Ti bangkay ni Calawit ket naiyawid iti balay da idiay Baguio City.
