BR LA UNION – Napatawan ti 11 a tawen a pannakaibalud iti maysa a public school principal idiay Virac, Catanduanes gapu iti panangpeke ti dokumento ken panangala ti P5,000 manipud iti pondo ti gobyerno.
Kalpasan nga aprubaran ti Sandiganbayan idi Pebrero 12 iti nagbalin a desisyon ti Virac Regional Trial Court (RTC) Branch 42 idi 2023, nakedngan a guilty iti principal ti Taytay Elementary School, iti kaso a malversation of public funds ken falsification of documents.
Para iti kaso a malversation, inaprubaran ti anti-graft court iti sentensiya nga impataw ti RTC nga uppat a bulan ken maysa nga aldaw agingga tallo a tawen a pannakaibalud, disqualification ni Sicio iti anyaman a posisyon iti gobyerno ken agbayad ti multa a P5,000.
Nangipataw pay ti Sandiganbayan ti kanayunan a multa a P5,000 kas civil liability, kaibatugan ti kantidad a maipagarop nga imbulsa na.
Para met iti kaso na a falsification, binaliwan ti Sandiganbayan iti desisyon ti RTC.
Segun iti anti-graft court, ni Sicio ket rumbeng a mapatawan ti nadagsen a pannusa kas maysa a public official gaputi panangpeke ti dokumento.
Gaputi dayta, binaliwan ti Sandiganbayan iti sentensiya ni Sicio iti kaso a falsification, a nagbalin nga innem a bulan ken maysa nga aldaw agingga iti walo a tawen.
Pinatawan pay ti korte ti multa a P3,000 ni Sicio.
Maibasar iti rekord ti korte, ni Sicio ket nakaaramid ti falsification, gaputi inaramid na a sales invoice a gimmatang ti pagadalan ti 28 a sako ti semento nga agbalor ti P7,000 ngem walo a sako laeng nga agbalor ti P2,000 iti maipagarop a ginatang ti principal.
Naamwan pay ti korte a saan a nailawlawag ni Sicio iti mapukpukaw a P5,000 a paset ti financial assistance a naipaay iti pagadalan manipud iti probinsiya ti Catanduanes.
