Inallukoy ti Catholic Bishops’ Conference of the Philippines (CBCP) iti publiko a kaduaen isuda iti panagkondena iti korapsion babaen ti nalawa a panagtitipon a manamnama a maangay iti EDSA People Power Monument inton bigat, Setyembre Baente Uno, kas paset ti “Trillion Peso March.”
Panggep ti aktibidad nga allukuyen iti gobierno nga agpalawag iti maipagarop a trillion nga anomalya kadagiti flood control projects iti napalabas a sangapulo ket lima a tawen.
Manamnama a dumar-ay dagiti rinibo nga umili manipud kadagiti nadumaduma a sektor, pakairamanan iti simbaan, agtutubo, ken civil society groups.
Maaddaan ti nasantuan a misa idiay EDSA Shrine sakbay iti martsa kas panangiraman ti kararag ken panawagan para iti hustisia.
Napili iti Setyembre 21 tapno lagipen iti deklarasyon ti Martial Law ken palagipan iti publiko iti kinapateg ti pagsungbatan.
Kagiddan ditoy, mangisayangkat met dagiti prayer rally dagiti dioceses kadagiti probinsia tapno makipamaysa iti panggep ti panagtitipon.
Nagpanawagan dagiti obispo kadagiti amin a Pilipino a makipaset iti nakappia a panagtignay para iti kinapudno ken panagbalbaliw.###
