Pinasingkedan ti Bureau of Jail Management and Penology (BJMP) a naitaray iti ospital idi Sabado ti nakabalud a lider ti Kingdom of Jesus Christ (KOJC) a ni Pastor Apollo Quiboloy.
Segun ken ni BJMP spokesperson Jail Superintendent Jayrex Bustinera, naiturong ni Quiboloy sadiay Rizal Medical Center (RMC) ti BJMP-Pasig City Jail Male Dormitory idi agarup alas singko ti malem ti Sabado kalpasan a nagreklamo a marigatan nga aganges.
Inrekomendar ti BJMP Physician a maiturong ti kaasitgan nga gobernment hospital ni Quiboloy para iti maitutop a medical intervention.
Segun iti opisial ti BJMP, inrekomendar ti attending physician a maconfine ni Quiboloy iti ospital agsipud ta na-diagnose isuna nga addaan iti community acquired pneumonia.
Impasigurado pay ti opisyal nga agtaltalinaed ni Quiboloy iti kustodiya ti BJMP ken nainget ti seguridad iti nasao a lugar bayat a naka-confine daytoy.
Iti agdama ket sumangsango ni Quiboloy iti adu a kaso pakairamanan ti non-bailable qualified human trafficking, child ken sexual abuse.
