Pinasingkedan ni Philippine Ambassador to the United States of America Jose Manuel “Babe” Romualdez a nakaisubmitiren ti Estados Unidos ti pormal nga extradition request para kenni Pastor Apollo Quiboloy, a nu mapalubosan ket posible nga agtalinaed iti pastor ti kustodiya iti US Marshals.
Segun kenni Romualdez, adda iti bukod nga eroplano ti US Marshals nga agbiahe ditoy a mangala kenni Quiboloy ditoy Pilipinas ken insigida nga iturong isuna idiay Los Angeles.
Kumadwa met iti operasyon dagiti Federal Bureau of Investigation (FBI) agents tapno ipatalged ti kinaannayas ti pannakaiyakar ti kustodiya.
Inladawan ti ambassador iti kaso kas ‘high-profile international matter’ gapo iti human ken sex trafficking, a karaman kadagiti prayoridad iti law enforcement ti intero a lubong.
Immunan a napatulodan iti extradition request ti Department of Foreign Affairs (DFA) iti Hulyo sakbay a nai-endorso sadiay Department of Justice (DOJ) para ti legal a proseso.
Sumangsango ni Quiboloy iti sex trafficking, bulk cash smuggling, fraud, ken racketeering idiay Estados Unidos nga ita ket agdama a nakadetene sadiay Pasig City Jail gapo iti naisina a kaso ti qualified human trafficking nga awanan iti piyansa.
