Opisyalen a karaman ti Senatorial line-up ti Partido Demokratiko Pilipino Lakas ng Bayan (PDP Laban) nga idadauloan ni sigud a Presidente Rodrigo Duterte ti nakadetene a KOJC founder a ni Pastor Apollo Quiboloy para iti 2025 midterm elections.
Iti maysa a statement nga inruar ti partido, inyebkas ni Quiboloy ti panagyamanna iti PDP-Laban Leadership kalpasan nga opisial a nairaman isuna iti listaan dagiti kandidato kina-senador ti partido.
Maipalagip a ni Quiboloy ket nangibaw-ing iti Certificate of Nomination and Acceptance (CONA) na iti sidong Workers’ and Peasants’ Party idi Oktubre 21, 2024 kalpasan a ti lider ti Labour a ni Sonny Matula ket nangkuestion ken kinunana a ti nominasion ni Quiboloy ket saan nga balido gapu ti unauthorized signatory.
Idi agangay, inkeddeng ni Quiboloy ti agtaray a kas maysa nga independent candidate sakbay nga inampon PDP Laban.
Agdama a nakadetene ni Quiboloy sadiay Pasig City Jail ken sumangsango iti human trafficking, sexual ken child abuse charges.
Malaksid kenni Quiboloy, karaman pay ti PDP-Laban senatorial slate isuda Jimmy Bondoc, Senador Ronald Dela Rosa, Senador Christopher Bong Go, Jayvee Hinlo, Raul Lambino, Rodante Marcoleta, ken aktor a ni Philip Salvador.
