Nakumpleton ti International Criminal Court (ICC) ti uppat-nga-aldaw a confirmation of charges hearing kontra kenni sigud a Presidente Rodrigo Roa Duterte.
Inlatag ti depensa ken ti prosekusyon dagiti argumento da ken nalawag nga adda iti nagdumaan da ti perspektibo.
Segun kenni Presiding Judge Iulia Antoanella Motoc, mangisayangkat ti deliberasyon ti hukom ken mangiruar ti desisyon ti uneg ti 60-nga-aldaw nu ituloy da pay ti kaso iti naan-anay a panagdengngeg.
Tallo a bilang ti crimes against humanity ti naipila kontra kenni Duterte, pakairamanan ti murder ken attempted murder gapo kadagiti rinibu a pammapatay manipud 2013 agingga 2016 ken idi panawen ti “war on drugs” manipud Hulyo 2016 agingga Setyembre 2017.
Impaganetget ti prosekusyon nga inusar ni Duterte ti “Davao model of killing” kas paset ti kampanya ti kina-Presidente ken naipatungpal daitoy ti intero a pagilian babaen ti opisyal a Command Memorandum Circular.
Iti biang dagiti nangibagi kadagiti biktima, a ti kampanya kontra droga ket nangigubuay ti sistematiko a panagpatay ken nakaro a panagbuteng ti komunidad.
Saan pay a naan-anay a panagdengngeg ti confirmation of charges hearing nu di ket panagtingiting paylaeng ti nu adda ti umdas ken natibker a basaran tapno agrang-ay ti kaso iti full trial.
Apaman mapasingkedan dagiti alegasyon, maiyuswat ti full trial tapno madesisyonan nu anya iti pagsungbatan ni sigud a Presidente Duterte.
