LA UNION – Rinibu a residente manipud iti 2,500 a barangay iti Northern Luzon partikular iti Ilocos Region, Cagayan Valley ken Cordillera Administrative Region iti na-evacuate wenno immakar kadagiti babbalay da, sakbay ken kabayatan ti panagduprak ti Typhoon Nika idi Domingo ken Lunes.
Segun kenni Department of the Interior and Local Government Sec. Jonvic Remulla, kaadwan nga immakar ket dagiti residente iti low lying areas, dagiti asideg iti kabaybayan, karayan, ken asideg iti bantay, gaputi nagbalin a pangta ti layos ken landslide.
Kinuna na a dagiti nasao a lugar ket saturated wenno limmukneng iti daga gaputi agtultuloy a panagtudo, isunga nangato kunana ti posibilidad ti landslide wenno panagregga-ay ti daga.
Nupay nakarwaren ti bagyo NIKA iti Philippine Area of Responsibility, agtaltalinaed a naka-preposisyon iti militar ken pulisya ti saan a bumaba iti 14 a lugan pang-tangatang a pang-rescue ken transportasyon para iti panagitulod ti food packs kadagiti lugar a na-isolate gaputi ti bagyo Nika ken dadduma pay a naglabas a bagyo.
Segun iti sekretaryo, suspendido pay laeng iti biyahe wenno panaglayag iti kabaybayan gaputa nadawel pay laeng ti kondisyon iti baybay.
Iti agdama 700,000 a tattao iti agtaltalinaed kadagiti evacuation centers ken dagiti dadduma ket makipagnanaed iti cacabagyan da, kalpasan a dinadael ti bagyo iti babbalay dagitoy.
Dagiti napalabas a tallo a bagyo, a pakaibilangan ti Kristine, Leon ken Marce ket nangibati ti 159 a tattao a natay.
Kabayatanna, ditoy probinsiya ti La Union ket adda ti pakabuklan nga 62 families wenno buklen ti 162 individuals manipud Brgy. Mindoro idiay ili ti Bangar iti nag-pre-emptive evacuation ken nagturong da iti Bangar Municipal Hall, Covered Court, Municipal Evacuation Center ken Bangar Central School idi sakbay a dumuprak ti bagyo Nika para iti kinatalged dagitoy, maibasar iti datus ti Provincial Disaster Risk Reduction and Management Council wenno PDRRMC.
