Naisayangkaten ti ‘Rite of Sealing’ ti kabaong ti pimmusay a lider ti Simbaan Katolika a ni Pope Francis idi alas otso ti rabii ti Biernes, oras idiay Vatican, wenno alas-dos ti parbangon ti ita nga aldaw ti Sabado, oras ditoy Pilipinas.
Naaramid daitoy iti insayangkat a liturgical rite nga idauloan ni Camerlengo ti Holy Roman Catholic Church a ni Cardinal Kevin Farrell sadiay Saint Peter’s Basilica a nakakabilan ti bagi ti Santo Papa. Dinar-ayan daitoy dagiti nagduduma a Cardinals ken opisyales ti Holy See.
Kiniddaw met ti Office for the Liturgical Celebrations ti presensiya da Cardinals Giovanni Battista Re, Pietro Parolin, Roger Mahony, Domenique Mamberti, Mauro Gambetti, Baldassare Reina, ken Konrad Krajewski para ti Rite of Sealing.
Karaman kadagiti nangasistar iti seremonya ket isuda Archbishop Edgar Peña Parra, Archbishop Ilson de Jesus Montanari, Monsignor Leonardo Sapienza, Canons of the Vatican Chapter, Ordinary Minor Penitentiaries of the Vatican, Sekretaryo ni Pope Francis, ken dadduma pay a pinalubosan ti Master of Pontifical Liturgical Celebrations a ni Archbishop Diego Ravelli.
Daitoy a naturang liturgical rite ket marka ti panagleppas ti public viewing idiay St. Peter’s Basilica, nu sadino ket dimmanon ti 90K a tattao ti nangipaay ti pammadayaw para ti maudi a kanito iti pimmusay a Santo Papa.
Kabayatanna, maisayangkat met ti funeral mass para kenni Pope Francis, alas-10 ti bigat oras idiay Vatican, ita nga aldaw ti Sabado, Abril 26 wenno alas kwatro ti malem, oras ditoy Pilipinas.
