Binabalaw ti Department of National Defense (DND) ti waragawag iti Chinese Embassy a mangkedkedked a bigbigen ti 2016 Arbitral Award, ken kinuna a pagsarmingan daitoy iti panggep ti China ditoy Pilipinas.
Segun kenni Defense Secretary Gilberto Teodoro Junior, ipakpakita laeng ti sungbat iti embahada ti kinaawan sinseridad iti China ti nasao a saritaan.
Sakbayna ket impaganetget ti Department of Foreign Affairs (DFA) a pinal ken addaan bileg ti arbitral ruling, a mangbigbigbig iti karbengan ti Pilipinas idiay West Philippine Sea, kasta met iti panangiwaswas iti “nine-dash line claim” ti China.
Kabayatanna, nangipatungpal met ti nasao a pagilian kadagiti sanctions maibusor kenni Teodoro ken ti pamilya na. Karaman ditoyen ti pannakaiparit a sumrek idiay China, Hong Kong, ken Macau.
Inton Hulyo 12, rambakan ti Pilipinas ti maika-10 nga anibersaryo ti arbitral ruling, nga agtaltalinaed a kangrunaan a legal a basaran iti panangiyunay-unay iti karbengan ti pagilian idiay West Philippine Sea.
