LA UNION – Agyamyaman dagiti kameng ti San Fernando Police Station iti agtultuloy a suporta kadakuada partikular iti naisayangkat a drug buy bust operation ditoy siudad.
Iti interview ti Bombo Radyo La Union kenni Police Lieutenant Colonel Fernando Acain Junior, impeksa na iti panagyaman na iti nabiit pay a balligi nga buybust operation agsipud ta nu saan a natiliw dagitoy ket adu manen iti dadaelen da a biag ken masakbayan iti umili.
Kinuna iti opisyal a saan a lokal ti La Union dagiti suspek nu di ket naggapo pay iti Siudad ti Caloocan.
By order basis iti transaksyon dagiti grupo ken maien-endorso da babaen iti middleman; mapmapan dagitoy iti nagtulagan a lugar ken ditoy da metten nga ibagsak iti kontrabando.
Nakapamitlo nga uliten a napurnada iti operasyon-da ken agdama metten iti imbestigasyon iti posible a kasabwat ditoy probinsya iti nasao nga grupo.
Segun kenni Police Lieutenant Colonel Fernando Acain Junior, saan a makaapekto daitoy iti drug-clearing operation program ditoy siudad nu di ket pagsyaataan pay agsipud ta mamonmonitor iti garaw dagiti drug personalities.
Babaen iti Drug-clearing Operation Program, paregtaen dagiti drug personalities iti tunggal barangay a maipasidong iti mandatory rehabilitation nga indauloan ni City Mayor Hermenegildo A. Gualberto, ken dadduma pay a maseknan babaen iti pannakaipasdek ti Balay Silangan nga agserbi kas drug rehabilitation center.
Apaman makumpleto dagiti dokumento, desisyunan ti Philippine Drug Enforcement Agency, Department of Interior and Local Government, ken Department of Health iti panagbalin a drug cleared status iti maysa a barangay.
Agtultuloy ti panangallukoy ti opisyal iti publiko a makitinnulong kadakuada ken nangipatulod met iti isuna iti mensahe kadagiti saan latta nga agsarsardeng iti madi nga aramid.
Segun kenkuana, saan nga agtalna iti kapulisan a mangsukimat kadakuada ken umanay pay iti tallopulo agingga uppat a pulo a katao iti uneg ti pagbaludan ti istasyon ti San Fernando PNP.
