Binaliktad ti Sandiganbayan ti desision da ken nadalusanen ni Senador Jose “Jinggoy” Estrada manipud iti kaso na a one count of direct bribery ken two counts of indirect bribery gapu iti kinakurang ti ebidensia.
Mainaig iti daytoy iti kaso ti mapapati a di umiso a pannakausar ti P183 million a Priority Development Assistance Fund (PDAF) allocations.
Maibasar iti 26-page Resolution a napetsaan iti Agosto 22 nga inted ti opisina ni Estrada, kinuna ti anti-graft court a malaksid iti P1 milion a naideposito idiay Bank of Commerce ni Estrada idi pay Setiembre 18, 2008 ket naamwan iti “9/18/2008” Summary of Rebates ni prosecution witness Benhur Luy.
Saan a nangidatag ti prosecution ti sabali nga ebidensia a nangpaneknek a ti kuarta ket naipatulod kenni Estrada.
Ti summary of rebates ket nangipamatmat ti panangipatulod ni Luy iti P5 million iti akusado ken katulongan idi ni Estrada a ni Pauline Labayen.
Nagserbi ni Luy kas financial officer dagiti non-government organizations a kukua ni Janet Napoles.
Naabsuelto ni Estrada idi Enero iti plunder charges mainaig iti mapapati a di umiso a pannakausar ti PDAF.
Naduktalan isuna a guilty iti bribery ken inapelar ti pannakakonbiktarna.
Imbatad ti prosekusion a ti non-governmental organization a kukua ni Napoles ti nakaawat kadagiti alokasion ti PDAF tapno maipatungpal dagiti proyekto ti gobierno ngem maipagarop nga inbulsada ketdi dagitoy ni Napoles kasta met dagiti mammanday-linteg.
Kinuna pay ti anti-graft court a saan a nailawlawag ti prosecution ti di panagtutunos dagiti kantidad, kas no apay a P1 million laeng ti inted ni Labayen ken ni Estrada idinto a kinapudnona kinuna ni Luy a P5 million ti naited ken ni Labayen para kenni Estrada.
Kinuna ti anti-graft court a saan a maipatarus a pasuksok ti inawat ni Estrada a pannakaited ti subject money kenni Labayen.
Makuna pay a napaay ti prosekusion a mangipasdek iti koneksion ti kuarta nga inawat ni Labayen manipud ken ni Janet Napoles ken ti deposito nga inaramid iti account ni Estrada.
