BR LA UNION – Intuding ti Korte Suprema inton Abril 1, 2025 ti panagdenggeg iti petisyon a mangkuwes-kwestiyon ti Constitutionality ti RA No. 12116 wenno General Appropriations Act of Fiscal Year 2025 (GAA) idiay Supreme Court Baguio Session Hall.
Iti petisyon nga indatag da Atty. Victor D. Rodriguez ken dadduma pay ket ipagpaganetget da a mailabsing ti GAA iti konstitusyon agsipudta awan ti nailatang a mandatory funding para iti PhilHealth.
Mailabsing pay kunada iti linteg iti panangi-ngato ti appropriation a nasursurok ngem ti rekomendasyon ti Presidente ken nangilatang ti kangatuan a budget iti imprastraktura imbes nga iti edukasyon.
Adda pay dagiti blangko iti Bicameral Committee Report on the General Appropriations Bill.
Iti preliminary conference ket naituding inton Pebrero 28, 2025, alas 1:00 p.m. iti Session Hall, SC Main Building, Manila.
Kabayatanna, inton Abril 22, 2025, alas-2:00 ti malem, a madengngeg idiay Supreme Court Baguio Session Hall iti petisyon nga indatag ni Sen. Aquilino Pimentel III kontra kenni Executive Sec. Lucas L. Bersamin, et al. a mangkuwes-kwestiyon iti bileg ti Republic Act No. 11954 wenno Maharlika Investment Fund Act of 2023.
Kidkiddawen iti petisyon a mangiruar ti korte ti temporary restraining order ken writ of preliminary injunction.
Inraman ti Korte kas respondent iti kaso iti Bangko Sentral ng Pilipinas ken government banks ken nabilin dagitoy a mangidatag ti komento iti uneg ti 10 nga aldaw.
Iti preliminary conference ket naituding inton February 26, 2025, alas-2:00 ti malem iti Session Hall, SC Main Building, Manila.
