BR LA UNION – Ibilang ni Supreme Court (SC) Associate Justice Ramon Paul Hernando nga unconstitutional iti panagikabil ti unprogrammed appropriations iti 2024 General Appropriations Act (GAA).
Maitunos iti opinyon seknan iti desisyon ti kangatuan a korte mainaig iti pannakaiyakar ti P60 billion a pondo ti Philippine Health Insurance Corporation (PhilHealth), kinuna ni Hernando nga awan ti naan-anay a “constitutional basis” ti panangiyakar ti pondo ti ahensiya ken nangpataud laeng ti risgo iti pondo ti gobierno kas ti kurapsiyon.
Imbaga ni Hernando a dagiti pondo a saan a sakopen ti GAA ket maipaulog laeng iti turay ti Kongreso a mangikeddeng no kasano a mausar dagitoy, babaen ti special appropriations law.
Maipalagip nga immunan nga imbilin ti nangato a korte ti pannakaisubli ti P60 billion a pondo ti PhilHealth a naiyakar iti National Treasury ken inpasardengna pay ti pannakaiyakar ti nabati a P29.9 billion a pondo ti ahensiya.
Inikkat pay ti Korte ti Special Provision 1(d) iti 2024 GAA ken DOF Circular No. 003-2024 a mangipalubos ti panagkolekta iti pondo manipud kadagiti government-owned and controlled corporations (GOCCs) para iti unprogrammed appropriations.
Inladawan ti Supreme Court iti probisyon maipapan kadagiti unprogrammed appropriations iti 2024 GAA a kas “ambiguous” gapu iti pannakausar ti termino a “fund balance” a saan a nalawag a depinisyon ti nasao a linteg.
Segun pay ti Korte, ti nasao a termino ket nangpataud iti pannakariro ken saan a maitunos iti tarigagay ti GAA a mangipaay iti napudno ken nalawag nga impormasyon maipapan iti pondo ti gobierno.
