BR LA UNION – Iti tengnga dagiti report seknan iti posible nga arrest warrant manipud International Criminal Court (ICC), nagpadlawen ni Senador Ronald “Bato” dela Rosa babaen ti post iti social media, nga adda pakainaigan ti pammati na.
Ni Dela Rosa, a saan a dimmar-ay iti naudi a dua a sesyon ti Senado, ket nangibinglay ita ti dua a nagsina a post — umuna, iti ladawa a naka-iggem ti Santo Niño ken ti maikadwa, ladawan a kadwa na ni Father Cianno Ubod ti Compostela Parish Church idiay Cebu.
Inbinglay ti senador ti maipapan iti pannaki-sinnarak na kenni Ubod.
Kinuna na, a kadagiti kastoy a kanito, kasapolan ti kumiddaw ti pannarabay manipud iti spiritual adviser kagiddan ti panagyaman na kenni Father Ubod.
Saan a nalawag nu adda pay laeng idiay Cebu ni Dela Rosa iti agdama, ngem maysa a lawasen ti napalabas sipud nag-post iti video bayat a tumultulong kadagiti nadidigra ti bagyo iti nasao a probinsiya.
Nupay kasta, awan pay ti komento ni Dela Rosa seknan iti maipagarop a panang-isyu ti ICC ti arrest warrant kontra kenkuana.
Segun iti abogado na a ni Atty. Israelito Torreon, ammo da iti agwar-waras a report ngem awan pay ti kumpirmasyon nu pudno ti nasao nga impormasyon.
Ni Dela Rosa ket sumangsango iti kaso nga adda pakainaiganna iti crimes against humanity gaputi papel nga inakem na idi panawen ti nadara a kampanya kontra droga ni sigud a Presidente Rodrigo Duterte.
Kas sigud nga hepe ti Philippine National Police ken maibilang a kangrunaan nga opisyal ni Duterte, ni Dela Rosa ti nangiruar ti Command Memorandum Circular No. 16-2016 kalpasan a nagtugaw kas PNP chief.
Ti nasao a memorandum iti nagbalin a basaran ti Project Double Barrel, a nang-rugyan ti kampanya kontra iti ilegal a droga ni Duterte nga idi agangay ket naam-ammo kas Oplan Tokhang.
