BR LA UNION – Inbutaktak ni Senator Panfilo “Ping” Lacson a maipagarop nga adda alokasyon a multi-bilyon a balor ti pork-barrel para iti sumagmamano a mammanday linteg.
Umabot kunana ti agingga P15 billion iti awaten ti maysa a kongresista.
Mainaig iti daytoy, inwaragawag ti Senador nga adda laeng P200 million pork barrel wenno Priority Development Assistance Fund (PDAF) dagiti Senador idinto a dagiti miyembro ti House of Representatives ket addaan ti P70 million sakbay nga indeklara ti Korte Suprema nga unconstitutional wenno illegal daytoy.
Nupay kasta, kalpasan kunana a naideklara daytoy a maikontra iti konstitusyon, dimmanon ketdi iti P5 billion para kadagiti Senador, P10 billion para kadagiti dadduma idinto a P15 billion para kadagiti kongresista.
Linagip ti Senador a sakbay a nalpas iti termino na idiay Senado idi 2022, imbaga ni Lacson a naaramidda idi kenni Senator Franklin Drilon nga ikkaten manipud iti bicameral committee report dagiti pondo para iti dredging ken flood control projects a segun kenkuana, dagitoy ti pagtataudan ti korupsiyon, ngem agsub-subli manen ita .
Kabayatanna, plano ti senador a lawlawagan apaman nga ag-convene iti 20th congress ti initial findings manipud iti national budget ita a tawen 2025.
