Mabalin nga ipaarestar ti Senado ni Bamban, Tarlac Mayor Alice Guo no saan pay laeng nga agparang iti hearing da inton Hulio 10.
Daytoy ti pangta ni Senador Sherwin Gatchalian kalpasan a saan a timmabuno ni Guo iti preliminary investigation ti Department of Justice ken ti laeng abogadona ti nagparang iti imbestigasion.
Impetteng ni Gatchalian, saanda nga ipalubos a saan a tumabuno ni Guo ken ti laeng abogadona ti sumango kenkuana gapu ta adda subpoena nga ipatulod ti Senado iti mayora tapno pilitenna nga agparang iti hearing.
No ipilit ti mayora ken saan a sanguen ti imbestigasion, mapilitanda nga ipa-contempt ni Guo ken mabalin a mangipaulog iti arrest warrant tapno maarestar isuna ken maiyapan idiay Senado.
Kabayatanna, patien ni Gatchalian nga awan ti anxiety ni Mayor Guo gapu ta naaramiden daitoy iti nagulbod iti namindua a daras kenkuada.
