Inwaragawag ti Provincial Government of La Union nga agsublin ti serrek kadagiti pribado ken pampubliko a pagadalan iti amin a level, ken trabaho kadagiti opisina ti gobyerno ita nga aldaw, Hulyo 28, 2023.
Laksid nga adda pay laeng iti mapas-pasaran a sagpaminsan a napigsa a panagtudo, inikkan ti PGLU iti diskresyon nga agsuspendir ti klase wenno trabaho iti Local Government Units (LGUs) ken management iti naduma-duma a kompanya ken institusyon nu kasapolan.
Agarop alas 8:00 idi rabii, July 27, 2023 nagdeklara iti suspensyon ti klase kadagiti pampubliko a pagadalan iti amin a tukad ken trabaho iti government offices ti LGU Balaoan ken LGU Luna, La Union.
Kabayatanna, segun iti PAGASA, iti Southwest Monsoon wenno habagat a pinapigsa ti rimuaren nga EGAY, ket agtultuloy a mangigubway ti panagtudtudo iti lumaod a paset ti Northern ken Central Luzon, ken Southern Luzon iti sumaganad a tallo nga aldaw.
Partikular nga agtultuloy a makapadas ti panagtudtudo ita nga aldaw ket idiay Batanes, Ilocos Region, Zambales, Bataan, Cavite, the southern portion of Quezon, MIMAROPA, Bicol Region, ken Western Visayas.
