Napagtalinaed ti Severe Tropical Storm Gardo iti kapigsana bayat nga agturong iti Amianan Amianan-a-laud iti Philippine Sea.
Alas-kuatro itay parbangon, naudi a nasaripatpatan iti bagyo iti kaadayo a 1,280 km Daya Amianan-a-daya ti Extreme Northern Luzon.
Kabuyog na iti angin a 95 km/h asideg ti tengnga ken kapegges nga agingga 115 km/h.
Dupdupagen na ti Amianan Amianan-a-laud iti kapaspas a 25 km/h.
Maibasar iti forecast track ti PAGASA, agtalinaed iti bagyo Gardo nga adayo iti kadagaan ti Pilipinas ken kangrunaan a tumbuken na iti amianan a direksion agingga makaruar iti Philippine Area of Responsibility (PAR) ita bigat wenno inton malem.
Manamnama a kumapsot iti bagyo ken agbalin a tropical storm inton malem, ngem saan a maik-ikkat iti posibilidad nga agtalinaed daytoy a severe tropical storm iti sumaruno a 12 nga oras.
Kabayatanna, rimuaren iti PAR ti Bagyo Francisco. Nupay kasta, agtaltalinaed a mangpatpatudo idiay Batanes ken Babuyan Islands.
Agtultuloy a mangapektar iti Southwest Monsoon wenno Habagat iti nadumaduma a paset ti pagilian. Makapadas ti sagpaminsan a panagtudo wenno occasional rains iti Zambales, Bataan, ken Occidental Mindoro; mawaraswaras a panagtudo idiay Metro Manila, Ilocos Region, Cordillera Administrative Region, CALABARZON, Western Visayas, nabatbati a paset ti Cagayan Valley, nabatbati a paset ti Central Luzon, ken ti nabatbati a paset ti MIMAROPA; bayat a mapatto-pattok a panagarbis iti nabatbati a paset ti Luzon ken Visayas.
Iti kapada a paniempo iti igubuay ti Localized Thunderstorms idiay Mindanao.
SUNRISE: 5:27 AM
SUNSET: 6:34 PM
