Ikustodia ti Senado da Shiela Guo, kabsat ni dati a Bamban Mayor Alice Guo, ken Cassandra Li Ong ti Lucky South 99 Outsourcing Incorporated agsipud ta sangsanguenda ti imbestigasion kadagiti krimen a mainaig iti Philippine Offshore Gaming Operators (POGO) a naikeddeng inton sumaruno a lawas.
Ti statement ket pinirmaan ni Senate spokesperson Arnel Jose Bañas ken inruarna idi Biernes, maysa nga aldaw kalpasan a simmangpet da Shiela ken Cassandra ditoy pagilian kalpasan a nakemmeg ida dagiti autoridad ti Indonesia.
Iti imbestigasyon inton Agosto 27 ket idauloan da Senate committee on justice and human rights Minority Leader Aquilino Pimentel III kas primary committee; Senate committee on women, children, family relations, and gender equality Deputy Minority Leader Risa Hontiveros kas secondary committee; ken Senate committee on public services Senator Raffy Tulfo kas tertiary committee.
Agtrabaho itan ti Kamara iti kaadda ti kustodia ni Ong, nga addaan met iti standing contempt order gapu iti maulit-ulit a saan na a panagparang iti agtultuloy nga inquiry maipapan kadagiti krimen a mainaig iti POGO.
Kinuna ni House committee on public order and safety chairperson ken Laguna Representative Dan Fernandez a ti panangikabil ken ni Ong iti sidong ti kustodia ti Kamara ket legal a wagas a panangaramid kadagiti bambanag gapu ta saan pay met a maipila ti kaso kontra kenkuana.
